Нæ уарзон къорд "Фидæн"-ыл 25 азы сæххæст
Æрæджы Хетæгкаты Къостайы номыл паддзахадон университеты концертон залы хъæлдзæгæй ацыд нæ адæмы уарзон музыкалон къорд "Фидæн"-ы юбилей.
Ацы аивадон коллективы репертуары ис бирæ алыхуызон жанртæ æмæ тематикæ, уарзон ирон адæмон, уырыссаг адæмон, эстрадон, хæстон, хъазахъхъаг æмæ авторон зарджытæ.
- Тынг æнхъæлмæ кæсæм нæ уазджытæм, уæддæр нæ хъусджытæ сты тынг зæрдæхæлар æмæ æппæты хуыздæр. Тынг æхсызгон нын уыдзæн нæ фембæлд. Абон мах зæрдæрайгæйæ бацархайдзыстæм, цæмæй нæ адæмы бахъæлдзæг кæнæм. Нæ пълæнтты фидæнмæ ис тынг бирæ хъуыдытæ, æмæ архайдзыстæм сæ сæххæст кæныныл,-загъта паддзахадон филармонийы кусæг, "Фидæн"-ы солист Нартыхъты Валери.
Кады гæхæттытæ сын радта Цæгат Ирыстон-Аланийы Парламенты номæй закъонæвæрæг оргæны Сæрдар Тускаты Таймураз Цæгат Ирыстоны музыкалон аивады къабазы сгухтдзинадты тыххæй æмæ бирæазон æнтысджын архайды фæдыл.
- Арфæ уын кæнын уæ юбилeйы фæдыл, мæ хæлæрттæ. Бузныг уын зæгъын уæ аивадон куысты æмæ Фыдыбæстæмæ уарзондзинады тыххæй. "Фидæн"-ы аивадон фæндаг у-бæлвырдæй ирондзинад бахъахъхъæнын. Сымах æцæгæйдæр стут адæмон артисттæ, зонут æмæ уарзут нæ адæмы, ууыл дзурæг у уæ аивад. Мæ зæрдæ уын зæгъы ноджы бæрзонддæр æнтæстдзинæдтæ. Уырны мæ тагъд рæстæджы та кæй фендзыстæм ног концерттæ,-загъта Тускаты Таймураз.
Къорды солисттæ сты Республикæ Цæгат Ирыстон-Аланийы сгуыхт артисттæ-Чекойты Артур, Нартыхъты Валери, Датиты Аслæнбег. Цæгъдгæ та сын кодтой инструменталон къорд "Александровский проспект".
Уазджытæ уыцы изæр концертæй цыдысты зæрдæрайгонд æмæ хъæлдзæгæй, алкæмæн дæр сæ зæрдæмæ фæцыд, уый бæрæг уыд залы иу уæгъд бынат дæр кæй нæ уыд, уымæй.
Цæгæраты Эльмирæ
