20.11.24
Курдиат æмæ аивадмæ зæрдæргъæвддзинад Олегæн уыдысты æмæ сты йæ ныфс æмæ фарны цырæгътæ, йæ разæнгардгæнджытæ. Уыдон ын амыдтой æмæ амонынц аивады раст æмæ бæлвырд фæндаг. Хæххон-металлургион техникумы фæстæ Ходы фырт бацыд ахуыр кæнынмæ Цæгат Ирыстоны Культурæйы колледжы адæмон инструментты æмæ дирижеры хайадмæ. Ам ын йæ бирæвæрсыг курдиаты гæнæнтæ ноджы хуыздæр æмæ бæлвырддæр рахатыдтой, сæ рæзтæн æппæтгæнæнтæ арæзтой номдзыд музыканттæ Æлборты Феликс, Гæздæнты Булат, зындгонд зарæггæнæг Котолиты Мария, хормейстер Мамыкъаты Людмилæ æмæ культурæйы колледжы директор Цехъоты Ларисæ.
Æрыгон лæппуйы цымыдисдзинад тынгæй-тынгдæр кодта ирон музыкалон аивад æмæ инструментты арæзт æмæ зæлынад хуыздæр базоныны хъуыддаджы, зарæггæнæджы курдиаты тых дæр ын æнцой нæ лæвæрдта æмæ абон дæр нæ дæтты.
Ирон музыкалон инструментты равзæрды истори номдзыд композитортæ Æлборты Феликс æмæ Гæздæнты Булат куыд арф зыдтой, алы уадынгарзæн (инструментæн) цы нысаниуæг ис царды, уый Олегæн цы хуызы æмбарын кодтой, уый диссаг уыд! Цæмæй абон ирон музыкалон адæмон инструменттæ аивады парахатæй уой, зæлой, концертты, аивадон изæрты сæ адæм хъусой, уый тынг фæндыд Æлборты Феликс æмæ Гæздæнты Булаты. Иу æмæ дыууæ хатты Олег уазæгуаты Феликсы хæдзары уæвгæйæ, номдзыд композиторы сагъæсаг хъуыдытæ нæ фехъуыста, æнæмæнг кæй хъæуы ирон фыдæлтыккон музыкалон инструментты оркестр аразын. Уыцы куырдиат Оледжы зонд æмæ зæрдæйы ныффидар Хуыцауы фæдзæхстау. Йæ сæххæст кæнын кæд æнцон нæ уыд, уæддæр йæ хорз хистæр æмæ зондамонæг, номдзыд музыкант Æлборты Феликсы фæндон сæххæст кодта! Цы хуызы æмæ куыд куы бафæрсат, уæд уын зæгъдзыстæм, царды йæ рауадзын æнцон нæ уыд. Культурæ æмæ аивадмæ цы цæстæнгас ис æмæ йæ зиууæтты уавæр æмæ гæнæнтæ куыд сты, уый зонæм. Фæлæ Оледжы ныфс нæ саст.
Культурæйы республикон колледжы ахуыргæнгæйæ, кусын райдыдта Сывæллæтты сфæлдыстады республикон галуаны фæзминаг адæмон кафты ансамбль «Чысыл джигит»-ы. Колледжы æнтыстджынæй каст куы фæци, уæд та йæ ахуыр адарддæр кодта Кæсæг-Балхъары аивады паддзахадон институты.
Институты дæр райста арф æмæ бирæвæрсыг, фидар æмæ хæрзхъæд зонындзинæдтæ. Йæ ахуыр ам кæронмæ куы æрхæццæ, уæд кусын райдыдта Культурæйы министрады адæмон инструментты паддзахадон оркестры музыкантæй. Йæ сæргъ уыцы рæстæг лæууыд йæ ахуыргæнæг æмæ цæстуарзон хистæр Гæздæнты Булат.
Дыууæ мин æхсæзæм азы та Цæгат Ирыстоны Национ музейы бæстыхайы барады раздæры кусæг æмæ арæхстджын æрмдæсны Моурауты Сослан байгом кодта ирон музыкалон инструменттæ аразæн æрмадз. Уым йемæ базонгæ Ходы сæрæн Олег. Ныхас кодтой фыдæлты музыкæ æмæ аивадыл. Ирон адæмон музыкалон инструментты оркестр æй саразын кæй фæнды, уыцы хъуыды Сосланæн бамбарын кодта Олег. Æмæ йæ фæнд Моурауыфырты зæрдæмæ тынг фæцыд. Фидæны сфæлдыстадон артдзæстæн фыццаг ирон уадынгæрзтæ (зындгонд композитор Кокойты Тæтæрхъаны термин –авторы фиппаинаг) Сослан сарæзта.
Къахдзæф-къахдзæфы фæдыл æмæ сабыргай-сабыргай фыдæлтыккон музыкалон интрументты оркестр арæзт æрцыд. Сæ фыццаг концерт курдиатджын фæсивæд раттой 2008 азы Дзæуджыхъæуы Хетæгкаты Къостайы мемориалон хæдзар — музейы, уыд сын цалдæр сфæлдыстадон изæры Плиты Иссæйы хæдзар-музейы дæр.
Фыццаг гастролон стыр æмæ кадджын балцы ацы аивадон къорд ацыд 2009 азы Мæскуымæ, Хетæгкаты Къостайы райгуырды 150 азы юбилейы архайынмæ. Концерт та уыд Стыр театры. Уыцы рæстæг сæм хорз цæст фæдардтой нæ республикæйы культурæйы уæды министр Хæбæлаты Фатимæ æмæ йæ хæдивæг Мамсыраты Сослан, Цæгат Ирыстоны паддзахадон филармонийы уæды директор, ныр та йæ аивадон разамонæг, зындгонд композитор, музыкант, Уæрæсейы Федерацийы аивæдты сгуыхт архайæг Махъоты Ацæмæз. Уыцы аз оркестрæн Ходы Олег ратта ном «Ирыстон».
Абон Цæгат Ирыстоны паддзахадон филармонийы адæмон музыкалон инструментты оркестр «Ирыстон» у нæ республикæйы æмæ Цæгат Кавказы зындгонддæр æмæ кадджындæр аивадон къордтæн сæ тæккæ хуыздæртæй иу. Йæ репертуар у стыр æмæ цæсты ахадгæ. Фæцæгъдынц ирон, уырыссаг адæмон æмæ профессионалон композиторты уацмыстæ.
